Hejîra Çavnebar
Şiyar Silêman
Hebû darek hejîran
Bibû diya feqîran
Bi êmîş û bi ber bû
Ew pir bi xwe bawer bû
Siya wê pir berîn e
Tîna rojê dişkîne
Gundî lê dibûn mêvan
Bi govend û bi dîlan
Kêfa wan wê dişopand
Ji xweşiyê dilîland
Roj bi roj û dem bi dem
Şahî lê bû kul û xem
Darên li derdora wê
Guh didan serbora wê
Ji wan re got: Hevalno!
Xwişkên şêrîn, delalno!
Çi nervînek xerab e
Êdî çavê’m bar nabe
Sî û ber tev yên min in
Xelk dilxweş û devken in
Nema didim hejîran
Çiqlan dikim wek tîran
Nema pelan şîn dikim
Ji xweşyê re ez rik im
Ked û westan ya min e
Xweşî ya kesên din e
Dem guherî bû buhar
Xemilandin gul û dar
Lê hejîra çavnebar
Ji dexsan maye bêbar
Ne pel hene ne êmîş
Maye wek şilfek qamîş
Cotkarî hat lê nerî
Dil bi kul û çav girî
Go dara min hişk bûye
Êdî tenê ardû ye
Ew qet kir û şewitand
Ji biharê qewitand
Jiyan merd û çavtêr e
Divê tu lê binêre
Yê dexsok û çavnebar
Dibe arya li pey ar
Raman ji helbesta) “Eltînetu Elhemqa” ya helbestvanê Libnanî Îliya Ebûmadî ye.)
